I Love Pidgin English Talk Talk (1)

 

Funny – Make we nor dey assume too much ooo!

Sometimes, we assume too much and too much assumption can be misleading and hurtful.
-Nor be every guy wen dey wear glasses know book. In many cases, na eye defect cause am.
-Nor be every lady wen dey speak good English dey intelligent. Just as dem use Pidgin English take train some of us from childhood, na so dem use good English train other people. To them good English be like their mother tongue, it has little to do with intelligence.
-Nor be everybody wen wear white coat inside hospital be doctor. Some na Pharmacists, others na Lab. Staff. Even in some hospitals, some experienced cleaners dey wear white coat.
-Nor be everybody wen wear suit for bank be banker, some na job applicants. Others na advanced security men. Some na visitors.
-Nor be everybody wen wear ordinary clothes be civilian, some na kaki men wen wear mufti. So, watch how u talk to people in public. These days wen e be like death sentence to wear some kind uniform, many people dey prefer mufti whenever possible. E get one guy wen just dey insult another man publicly. This guy nor know say this man in mufti na kaki man. This kaki man nor talk. At once d bad-mouth guy hear ‘kwouse’ ‘Jouse’ (authentic slaps, slap wen dey identify the occupation of the slapper. Wen u receive some slap, u the slappee go know whether d slapper na army, police or bloody civilian)
-Nor be everybody wen u see dey drive new car for road be rich man. Some na official drivers for the original owners. Some na mechanic wen d owner send to repair d car. Some dey use am teach d original owner how to drive or dem borrow d car from a friend.
-Nor be everybody wen get big belly get money. Some na hereditary. Some are just alcoholics. Others na disease. Don’t be deceived.
-Nor be everybody wen travel abroad don hammer. Some still dey hustle like us. Nor be everybody wen put some kind foreign picture 4 facebook don travel out. Some na photo shopping. Some na Naija dem take d picture, it’s just a matter of settings or background. Nor be quarrel. Nor be beef. Na reality. Take people for who they are, every other thing na parade and fashion.
-Nor be everybody wen smile give u dey interested in u. If na waitress or receptionist, they were taught to smile to every customer as good work ethics. So, nor assume say d smile pass like dat. For other people, their face resemble smile. U may think they are smiling, na lie, na so their face be. Just like some people face resemble quarrel. So u go think say dem dey vex, na lie, na so dem face be. Some people, by nature, like smiling. It has nothing to do with u, na so dem be. 
-Ok na! Abeg nor dey assume too much o, make u nor collect. I wanna end here. Pls, I wanna go… ciao……