Jokes in Pidgin English (33) – Withhold and See!

Funny things wen man dey see! Long ago, i get one good friend wen dey visit me wella. This guy don finish sch; he still dey plan the way forward. Every time wen he visit, if him wan waka, i go give am small change to hold him side, make e nor lost. Anytime i give this guy money he go say, 'Bros, you don start again. I nor dey like say anytime i come here, you must give me something.' Every time i go beg the guy to collect because i reason say he nor get work. Na so the guy dey do like say i dey use my hard-earned money dey embarass am. So one day, i come decide say next time this guy show, i nor go give am kobo. So, wen the guy show, we gist, watch film, eat wella. So wen the guy wan go, i escort am small, say bye-bye, i nor give am anything. O boy, many months don pass, i nor see this guy again. I call am for phone, 'Guy, how far na? I nor see you again. You don forget me?' The guy reply, 'Bros, i dey very busy these days, i nor dey get chance. You know say your place far well well.' Till now, i nor see the guy breaklight. The thing dey pain me. Small test wen i give this guy, he fall break leg. But this strategy dey work o. If you get friend wen na only 'come chop, come drink, come take' e sabi, try this my test. I dey call am, 'Withhold and see'.