Jokes in Pidgin English (17) – Come enter!

Abeg my people, make who na remember say nor be every motor or drop person dey enter o. Before you enter any motor, whether na free lift or lift to pay in cash or kind, abeg look the faces wen dey the motor and use your instincts, if your mind tell you say 'nor enter! nor enter!', my guy nor enter o. Na so dat year wen i dey hustle for job for Abuja. I dey with one of my guys for Gwarinpa Estate. Every day, i go take drop go hunt for job. That time, na 400naira i dey pay for each drop. One day, i come out in d morning dey look for drop. Na so one man just drive come. D man dey smile one kind funny weird smile like say me na girl. I tell am where i dey go, i come ask am how much. D man say 100naira. I shock, place wen i dey enter 400naira everyday,sometimes na 500 i dey pay, dis man with em funny smile dey say 100naira. Fear catch me. I tell d man say,'Sorry ooo, I don change my mind. I nor go again'
D man say make i nor worry, 'enter'
I say, 'Bros, nor vex, i nor go again'
I come dey look the man. If dis man, use mistake come down, i go run like Usain Bolt. The man wait small, e come drive go.
O boy dat man make me fear dat day. Eh! Make i enter drop with that kind man, Abuja roads wen dey confuse person, before e go carry me lost, i nor go know.
My people, open your eyes. Stay safe! Peace!